Kovind, Modi nati Kerala, Karnataka, MP nüburtem den salem lemsatep

New Delhi, Yimpoksüi/November 01 (Agencies): Hokolbarnü linük Tir, Ram Nath Kovind aser Ato kilonser, Narendra Modi nati state tentetba anogomong nüngtem nung Haryana, Punjab, Madhya Pradesh, Chhattisgarh, Karnataka, Kerala aser Union Territory of Lakshadweep nüburtem den salem osang lemsatepogo.
Tiri twitter ajanga, “State tentetba anogo nung Haryana, Punjab, Madhya Pradesh, Chhattisgarh, Karnataka, Kerala aser Union Territory of Lakshadweep nüburtem den salem lemsateper. Item states aser asen linük nem terenlok tsütsü jenjang tasen alangzükdakjang,” ta metetdaktsü.
Modi-ia twitter ajanga, “Kerala Piravi anogo nung Kerala nunger kü aianutsür aser adianutem den salem lemsateper. Iba state nungi nüburtemi linük atema mapa tajung aika inyakogo. Iba state nüburtem pelaa alitsü aser azükarutsü atema sarasademtsür,” ta ashi.
Chhattisgarh nunger nem tenüngsang agüja Modi-i, iba state nung sobaliba tapu balala aika lir, iba state ya terenlok lenmang nung jajatsü atema sarasademtsür, ta ashi.
Modi-i twitter ajanga, “Tasütait sepaitem aliba, aluyimertem aliba, akhi sobaliba mongchen aser technology tasen adokdak Haryana state foundation day nung nüburtem den salem lemsateper. Terenlok lenmang nung maneni jaja iba state-i linük azükaru atema maneni inyaker,” ta ashi.
“Karnataka Rajyotsava ya Karnataka-i India terenlok atema inyakba atema benjungba anogo ka lir. State tepor ajungba den nüburtem dak temeim aketbaji ajaki meteta lir. Tarutsü nung Karnataka renloktsü atema sarasademtsür,” ta Modi-isa lemsatep.
“State foundation day anogomong nung Maharashhtra nunger den salem lemsateper. Ali nungi adokba rongsen jenti aliba aser sobaliba senmang aliba state ya aterenlok lenmang nung maneni jaja renloktsüla,” ta Modi-isa lemsatep.