KP Sharma Oli Nepal Prime Minister shimogo

Kathmandu, October 11 (Agencies): Nepal nung Linük Temzüng tasen ka yangluba sülen mepetmesü adoka aliba mapang ka nung Deobarnü Prime Minister menden atema tetoktepba agi aser iba nung KP Sharma Oli-i takok nguogo.
Parliament nung vote agitepdang CPN-UML chairman Oli-i vote 338 angu aser Nepali Congress Tir aser teinyakdak PM Sushil Koirala-i vote 249 dang angu.
Tanü vote agitepdang Parliament züngsem 587-i pei vote agütsü.
UCPN-Maoist, Rastriya Prajatantra Party-Nepal, Madhesi Janaadhikar Forum-Democratic aser tanga telok kari Oli pusema nungit aser külen United Democratic Madhesi Front nungi Madhesi telok pezüi NC lennir Koirala pusema nungit.
Arishi küm 63 tain Oli ya yaküm CPN-UML tanishir asütsü shim. Iba ya meinyakdang pa CPN-UML International Department nung tanishisang liasü.
2006 People’s Movement sülen Girija Prasad Koirala-i aniba interim government nunga Oli-i Deputy Prime Minister aser Foreign Affairs Minister inyak.
1991, 1994 aser 1999 nung Oli ya Jhapa district kübok constituency balala nung asembem tashi Parliament züngsem aküm.
Madhesi nungertemi Linük Temzüng tasenba anema lungkak aitba mapang ka nung Oli-i prime minister mapa benloker asütsü.
India den arrtsüa aliba tesemtem nung ozüng alema mapa inyakba ajanga India nungi tang nüngdakba osettsüset aser chiyungtsü belenba inyakyim nung obang meputep adoka Nepal aser India tsüngda mangatettep adoka lir.
Ita ka ser ta Madhesi aser Tharu kin den tanga kin tila kari lungkak aita police den mepetmesü balala atalokdang nisung 40 jungnüa taküm samaogo.
Madhesi Front-i ashiba agi, Linük Temzüng ajanga Nepal anüolentip tsütsü aliba Madhesi aser Tharu kintem atema temeten aser shilem peria magütsür.
Madhesi nungertem ya India nungi aoba nisungtem lir aser parnok ya India den arrtsüa aliba Terai region nung alir.