KPC züngsem ka amokmerenba aitsür

Kohima, Rongjui/Sept. 19 (TYO): Rongjui/September 19, 2018 nü Kohima jila nung tawa police officer ka tepsetba atema lokti procession aoba osang bendenba mapang nung Kohima Press Club (KPC) nung züngsem ka, news editor ka amokmerenbaji KPC-i aitsür, ta tanü KPC Acting President, Atul Sarma aser Genreal Secretary, Alice Yhoshü nati sangdong ka ajanga metetdaktsü.
Lokti longkak aitba tembangba sülen gari senzüsembongba tenzükba mapang longkak aiter telok kati news editor mena aliba gariji sot, aser la dang na kong nungi, ta asüngdang; lai la media züngsem ka, aser duty inyaker, ta shiaka mejangjaba nisung aikati gariji longbanger gari tesülen aina jaksatsü; mapang shia media nisungtem duty nung lia amokmerenba tatalokbatem ya kanga tia maka, ta KPC-isa metetdaktsü.
Item ama tatalokba ajanga osangbenertem security atema tebilemtsü akar, talisa asen lokti aser state nunga linük rangben den media nem sademsadema inyakdaktsür, ajisüaka item ama tatalokbatem ajanga tebilemtsü akar, ta sangdong nung shia lir.
“Ozü züngsem ka anema inyakbaji onoki aitsür, aser tim ketdangsertem, public lenirtem aser nüburtem dang peipei temeden aser mapa akhümtsübutsü aser osangbenertem sademsadema inyakdaktsütsü mepishir,” ta KPC-isa metetdaktsü.
“Onok osangbenertem ya tang longkak aitertem densema nübur tenzükba wadang inyaker, tang tatalokba osang shidak tazüngertem nem metetdaktsütsü atema inyaker,” ta KPC-isa metetdaktsü.