KPU-i ghonda 42 atema NH-2 mokdanger

Kohima, October 31 (TYO): State sorkari hao ta mali toktsüba agi tejashi nung Kandi Public Union-i tanep 6:00 ako nungi National Highway-2 nung ghonda 42 mokdangtsü tenzükogo.
Kandi Public Union nung Kohima district nung Tseminyu sub-division kübok yimtsüng 6 dena lir aser parnoki tanep nungi gari lenmang mokdangtsü tenzük.
NH-2 ajanga Nagaland kübok district aika Wokha district adena state yimtiba den sendakteper. Iba mokdangba sentong ya November 1 ayaterm nungang tembangtsü.
Mokdangba sentong takok ngua agidar aser district administration-i K Station aser Tsonsa nung police aser ketdangsertem peria lemzükja lir. KPU-i garitem mesenzüdaktsütsü asoshi volunteer noklang aika lemzükja lir, saka iba mokdangba kübok paramilitary, police, Magistrate on duty, Ambulance, Wedding Party, emergency Services (kuli tejangja abener) aser Press purtembo maitdaktsür, ta KPU President John Kath-i osangbener dang ashi.
Tseminyu sub-division nung Rural Development Block Chunlikha kübok Block Development Officer’s (BDO) office yangluba mapa tenzükang ta onoki aiben tezüluba nung temepishiba agütsü saka State sorkari hao ta melii toktsüba ajanga onoki lungkak aittsüsa akümer, ta paisa ashi.
BDO office RD Block Chunlikha yanglutsübaji 2012 küm lungbo azünga yutsü aser küm 5 lir külen work order ji November 11, 2016 nü M/s JK & Sons Constructions nem lemzüktsü. Ajisüaka, contractor-i ki yangluba mapa metenzüki lir, ta KPU President-isa metetdaktsü.
Iba dak sendakba nung sorkar dang aiben mepishiogo aser tesüsabubaji October 6 nü anogo 15 tsüngda mapa tenzüktsü mepishi. Ajsüaka, sorkar mesüra contractor nungi telangzüba kecha manguba agi onoki mokdangtsü lemtet, ta paisa shisem.
Ano külen, KPU Advisor Johnny G Rengma-ia ashiba agi, state sorkari iba mapa inyaktsü atema sen noklang nung shilem 35 bo agütsüogo saka tang tashi mapa kecha meinyak lir.
State sorkari parnok teinyaktsü kar meinyak nungbo onoki iba dang nungi tuluba mapa inyaktsü, ta paisa shisem.