Kr. Imlibenla-i rizüngba rongsen agi Rev. Longri Memorial Youth Hostel approach lenmang yanglutsütsü

Rev. Longri Memorial Youth Hostel approach lenmang yanglutsü asoshi mapa tenzüka aotsü sarasadem sentong ka agir külen, MTBA tenzüker, Aongza Ward yimden aser Kr. Imlibenla Jamir nungertem oset bendena akaba anasa tangokba noksa nung angur. Mkg, Aug 30, 2017.

Mokokchung, August 30 (TYO): Lokti asoshi inyaker social activist Kongru Imlibenla Jamiri Mokokchung town kübok Aongza ward nung aliba Rev. Longri Memorial Youth Hostel approach lenmang yanglutsütsü asoshi osettsüset bendenba maparen tenzükogo.
Tanü iba maparen tenzüka aotsü asoshi Rev. Longri Memorial Youth Hostel kima sentong tongmelang ka ayonga Mokokchung Town Baptist Arogo (MTBA) Associate Pastor Wb. Temsüwati Kichu-i iba mapa asoshi temoatsü meshia aser meshiteta sarasademtsüogo.
Tanü iba sentong nung Aongza Ward Chairman Wb. R. Longritemjen Ao-i Kr. Imlibenlai iba ama rongsen tulu tenlaa mapa tajung inyakba asoshi ward sanger ajak tenüng nung pelaba metetdaktsü.
Taoba Miss Nagaland Kr. Imlibenlai yanglutsütsü aliba lenmang tasazükji meter 150 shi asütsü aser iba mapa ya MTBA-i achayanga inyaktsü, ta angazüker.
Jangratemtsü kaji; iba lenmang yanglutsü asoshi sorkar mesüra tanga agency-tem nungi kecha nungi teyari magi saka lai rizünga akaba sen nungi lai akokba tenla agüja yanglutsür, ta Imlibenlai osangbenertem den jembidang ashi.
Rev. Longri Hostel approach ya Aongza pur asoshi tongti lenmang ka lir. Iba lenmang yanglutsü atema taoba mapang concerned authority dang telok balalai khuret lemsatepogo, aji saka, tanü tashi meyanglur. Anungji, “nübur nüngdakba reprangteta ni akokba (personal capacity) agi yariteper,” ta laisa shisem.
Kr. Imlibenlaisa MTBA Arogopur aser Aongza ward yimdeni amalitep tajung akaba asoshi pelaba lemsatepa liasü.
“Aiür ka dang süaka, lai rizünga akaba rongsen (saving) agi iba ama temeim (charity) mapa inyakba yabo jangratemtsüka lir, ibai nüburtem asoshi tangazüktsü lesson tuluka lir,” ta iba sentong nung adener kati iba osangbener den jembidang ashi.
Iba lenmang yanglutsü asoshi nüngdakba osettsüsettem bendendaki, joko yakta mapa tenzüktsü, ta angazüker.