Kr. Imlisunglai Aoli Pongen Mungdang – Academic Excellence Award agizük

2 buba Aoli Pogen Mungdang – Academic Excellence Award sentong takok ngua agir külen Award agizükla Kr. Imlisungla den lar tsürabur, APM tenzüker aser tongti shilem agirtem külemi tangokba noksa nung angur. Mokokchung, June 21, 2019.

Mokokchung, June 21 (TYO): 2 buba Aoli Pongen Mungdang (APM) Academic Excellence Award ta sür konang tetushi agütsüba sentong tajung ka Mokokchung nung APM Kimen Wb. K. Rongsenwati Pongen kidang ayongzüka agiogo. Iba Award ya par Pongen kidong rongnung lanurtem shirnoki Board mesüra University tatidang balala nung alakteta takok ngudir parnok nem senpettsür.
Taküm iba tetushi senpetji Longmisa nunger Dimapur nung alir Wb. Limaaküm aser tetsü Wt. Tajungsangla na jala Kr. Imlisungla Pongeni agizük. Lai taküm 2019 NBSE-i agiba HSLC (Class 10) tatidang nung top 14 jenjang nung takok angu. La ya St. Paul Hr. Sec. School, Dimapur nungi takok angu aser maneni la class 11-jia iba school nungjisa azünger. La züngzüker külen competitive exam balala agütsütsü tejangraba tulu lir.
Lanuwa nungi lai HSLC tatidang nung top adoktsü tejangraba nung Tsüngrem dang tashi tasen meshia meranga azüngba ama, la pungmang asangsang nung atalok, ta lai iba osangbener den jembidang ashi. Lesson bushitsü atema mapang kecha balaka atakteta mayu saka class nung tesayurtemi sayuba nentaka angazükba den home work mapang shitak nung inyak aser Tsüngrem dak teimla yur meranga azüngba ajanga iba jenjang ya tongtet, ta lai takok kuli kar agütsü.
Laisa lanurtem dang ashiakang o ka lemsatepdang, Tsüngrem dak tamang yur meranga azüngtsüla aser electronic gadgets ya awashi meteta tim lenmang nung amshitsüla, ta ashi.
2007 küm APM tenzüker küm 25 ajungba jubilee amungdang bangzüng kar renemba rongnung; “Pongener lanulachi shirnokisa Board/University tatidang balala nung takok tajungtiba jenjang ngutetdir, APM-i tapet senpet agütsütsü” ta renemba ama, 2016 nungi iba award ya agüja arudaki, ta Education Trust Award luden nung tayonger aser sentong lenir Wb. K. Mar Pongeni ashi. Iba Academic Excellence Award maparen ya APM kübok sub-committee Education Trust Award (ETA) teloki achayanger.
Tanü iba sentong nung Mokokchung Division PHED, Executive Engineer, Er. Pongeni tajungshi o jembidang, iba takok ya tetenzüker ka südaktsür, tarutsü nung senso tajung ka kümer lokti nem tajangzük agütsür ka akümba den alizüng tongtettsü asoshi nükjidong tejangja yur apusotsü ajungshia liasü.
Tanü iba sentong nung APM tir Wb. Sakowati Pongen, Ex. MLA Wb. Imtiyanger Pongen, MTBA Associate Pastor Wb. P. Toshi Pongen, ETA Co-convener Wb. K. Imtituba, APM Kimen Wb. K. Rongsenwati Pongen parnoki shilem balala agia tepela o den tayongzükba o tulu bener arua tesentepertem ayongzük. Iba sentong nung APM unit balala nungi ketdangsürtem arua aden.