Kr. Sünepmenla Lkr Miss Mkg 2016 shimogo

Miss Mokokchung 2016 Kr. Sünepmenla Lkr den 1st runner up Kr. Satempokla Lkr (R) aser Kr. Oienla Jamir nungertem takok ngur agiba noksa nung angur. Mokokchung, November 26, 2016. 

Mokokchung, Nov. 26 (TYO): Ajaki yongyaseta ataba ama Honibar aonung kongrular rongnung tobur ajung toktepba ‘Miss Mokokchung 2016’ shimba sentong yangi Town Hall Mokokchung nung akhümketa agiogo aser taküm Miss Mokokchung 2016-ji Merangkongtsür arishi küm 19 Kr. Sünepmenla Lkr shimogo.
La den atongdakla 1st runner-up Longsatsür Kr. Satempokla Lkr aser 2nd runner- up Süngratsütsür Kr. Oienla Jamir na liasü.
Takoker ajak nem nem tanga senpet (gift hampers) den sen 50,000/-, 30,000/- aser 20,000/-agütsü. Taküm Miss Mokokchung adoklaji District Disaster Management Authority (DDMA) indang “brand ambassador” küm ka atema asütsü.
Iba dak alaka Sub-titles senpettemji; Miss Photogenic aser Miss perfect 10 – Kr. Sunepmenla Lkr, Miss Congeniality – Kr. Satempokla Lkr, best complexion – Kr. Oienla Jamir, beautiful hair- Kr. Talipokla Pongen nungertem shim.
Taonung tedendangertemji; Kr. Tiarenla Jamir (chief judge), Wt. Asola Ozüküm, Wb. Limanüksüng Lkr, EAC Sp. R. Daniel Angami, Wt. Rongsenmenla Lkr nungertem liasü. Taküm iba sentong ya ‘Communique’ teloki “Elegance, a beauty that never fades” omen nung ajemdaker ayongzük.
Iba sentong nung Parliamentary Secretary for Agriculture, Dr. Benjongliba Aier tongti tesemdanger asütsü jaoka liasü saka pa koda masüba maparen kar ajanga pa marutet nung pa melena Mokokchung DC Sushil Kumar Patel IAS meyonger ka ama arua sentong meraketdaktsü.
Tetushi tesemdanger Nagaland BJP tatong tir Wb. Imsü Yadeni mapang tatsüka agia jembidang, Tsüngremi moatsüba tobur ajung sempetji mashileni masü saka timi amshitsü asoshi tayongzükba ka agütsü. Sentong nung telok balalai kentenmenü ajanga tesentepertem azüngmeyaka meyutsüi jangratemdaktsü.