KROS College nung Alumni Day amung

Dimapur, July 9 (TYO) : KROS College, Leirie Kohima nung Alumni Association-i July 8, 2016 nü “Carpe Diem” ta ser sentong ka ayongzüka agi.
Iba sentong nung mendenji Sonia Chung (Alumni of Batch 2012) liasü aser Alumni aser tang tezüngdakpurtemi kenten, tsüngsangba aser jilushi nunger shilem balala agi.
Sentong nung Lecturer-in-charge of Alumni, Toshinaro Imchen-i tesenteper pela agizüka o jembidang iba sentong ya bilemtettsü aser sendakteptsü atema kidangi meyipa aruba den mesüktepa lir ta ashi.
KROS College Principal, Imsuinla Imti-ia o jembidang college azüngba mapang menungraba ashi aser Alumni Meet 2016 nung nisung aikati shilem agiba atema pelaba metetdaktsü.
Laisa, Alumni aser tang tezüngdak kaketshirtem dang tanü alima nung meinprongba tensa ka nung alidang, katika dang nungi angazüktepba alitsü ayongzük.
Sentong nung Alumni temi pei ajangshia arubatem lemsatep aser college azüngba mapang parnok taküm jenjang yanglutsüba indang ashi aser Kenielhoutuo (Alumni of Batch 2013)-i anküp tepela o jembi.
Iba anogomung nüngtem nung “Rose day” ta ser amung aser iba ya Old Age Home semdangtsü, lokti asoshi mapa inyaktsü aser senso tajung ka akümtsü atema ayongzüka agi.