KROS College Women Development Cell-i shisa tokten sentong ayonga agi

Dimapur, July 17 (TYO) : KROS College Women Development Cell-i July 16, 2016 nü “personal grooming & hygiene” omen nung ajemdaker shisa tokten sentong ka Kevi Hall, KROS College, Leirie nung ayonga agiogo.
Iba sentong nung o jembitsü atema All India Radio Kohima nung Correspondent RNU, Anenla Jamir jaoka liasü.
Women development Cell convenor, Limakumla Imsong-i tarurtem pela agizükba mapang, “Tetsür nem tashi agütsür tadener rongnung densemdaktsü nungbo temelenshi bena aruba tsütsü sabi ka ama süla,” ta ashi.
Anenla Jamir-i, “Temang shilem anepalua merükmeju shitak asüba dang pei sasa renema aliba ta ajar. Meimchir ajak junga ngudaktsütsü aser anema alitsü atema merükmejua alitsü nüngdak. Pei sasa renemba aliba ajanga asen yimyayimpong nung dena terenlok adokdaktsür. Pei sasa renembaji, süoshi sen jenjang tasak sobuba mesüra makeup jenti agiba dang ajar masü, ajisüaka asen junga ngudaktsütsü atema temang shilem ajak kanga junga anepalua aser merüka ayuba dang ajar,” ta ashi.
Temang anema alitsü atema merükmeju junga asütsü nüngdak. Kodang merükmejuba ta südir iba nungji tzü chikoba, kou anepaluba, temezüng merüka ayuba, tetsüng anepaluba, metsü meshiba shilem anepalua merüka ayuba aser tebo anepalua ayuba dena lir, ta lai kanga telungi ia rasaa ashi.
Asenok ajak nem tobur tajung moatsü, ajisüaka asenoki asen temang anepalu mesütetba ajanga iba tobur ajungji mongudaktsür. Asenok kanga anibelema inyaker, chiyungtsü tajung machir aser mopung tamajung chisemer. Anungji asenoki temang anepalua merüka ayutsüji kanga nüngdaka kümogo, ta laisa ashi.
Iba sentong Yashinungla-i ketdang asü, Vevolu-i sentong tenzüka sarasadem aser Kevisenuo-i temeja ken ka aten.