KSC indang 1992-94 PU Batch Reunion sentong agi

Dimapur, Tsüklai/February 16 (TYO): Kohima Science College indang 1992-1994 Pre-University batch pur Reunion sentong February 10, 2024 nü Kohima Science College Auditorium nung agia liasü, kong India tesem balala aser bendang lima nungi züngsem 102 arua shilem agi.

Iba sentong nung menden ya Dr. Lanurenla, Principal, Sao Chang College liasü aser lai lar batchmates tem aser KSC principal, faculty, Alumni Association aser kaketshirtem pela agizüka liasü.

Oriental Theological Seminary nung Associate Professor, Rev. Dr. Ellen Konyak Jamir-i sentong nung Tsüngrem temoatsü jazüka sarasadem. G. Rio School, Kohima indang Dean of Students’ Affair, Kevino Savino-i anir “The Empty Chair” sentong agidang parnok külemi azünger nisung 20 alima nungi pilar aliba bilemteta parnok nem akum agüja liasü.

Kohima Science College kaketshirtemi anir teloki College Anthem aten aser parnok PU azüngba mapang bilemteta coffee table book ka Dr. Temjenwabang-i sayatsü aser 1992-94 batch pur küm 30 sülen tanaben ajurutepba asoshi tenüngsang agüja liasü.

KSC Alumni Association aser students body ajanga salem o jembiba den Atoho K Kiho-i ken tajung ka aten.

Sentong nung UK nungi Software Engineer, Er. Ravi Singh-i par batchmates tem tenüng nung “Down Memory Lane” bilemteta parnok college azüngba mapang ajangshibatem lemsatepa liasü.

Ethungbemo Ezung ajanga melepzüng o jembi aser teloki Reunion Anthem atenba sülen Keviyieno Zhasa ajanga sentong tembanga sarasadema liasü.

Maneni parnoki business hour aser nikongdang sentong ya Highland Park nung agia liasü.