KSCDL-i NHAK nem Smart Ambulance 2 agütsü

Dimapur, March 30 (TYO): Kohima Smart City Development Limited (KSCDL)-i Naga Hospital Authority, Kohima nem rongdak COVID-19 maparen inyakdang amshitsü atema Smart Ambulance ana agütsüogo.
Hombarnü KMC/KSCDL Office Complex Kohima nung Urban Development and Municipal Affairs Advisor, Dr. N. Nicky Kire-i MD NHAK, Dr. Thorse nem smart ambulance ana indang sapitem agütsü.
“Iba ya temoatsü ulura lir, kechiyong tang tensa nung iba ama ambulance tajung ya nüngdaker, kechiyong smart ambulance nung shirang aser driver atema takdang balala lemasa lir” ta Dr. Nicky Kire-i ashi.
“Ni Kohima aser temeket nung mozü ki aika sema senzüogo aser idangji COVID 19 anema inyaktsü renema aliba nguogo. Nisungtemia iba wara indang osang meteta lir aser süoki ia bilemer” ta paisa ashi.
“State sorkari nübortem iba wara nungi jenbua alitsü atema akokba tashi mapa inyaker. Onoki mapa tajungtiba inyakdar anungji social media nung state sorkar indang osang tamajung kar prokshiba nung mamangtsü mepishir. Sorkari mapa tajung inyakbatema nisungtemi ajitettsüla” ta Advisor-isa shisem.
Urban Development & DMA Principal Secretary, Himato Zhimomi-ia o jembidang “state sorkari mapa tajungtiba inyaker aser ibaji sorkar atema bilemja inyaker” ta ashi.
“Iba wara anema doctor, nurse aser paramedic temi mapa tajung inyakba atema pelar aser tenüngsang agütsür aser nenok ya shitakba Tsüngrem osang abenertem” ta Himato-isa metetdaktsü.
“Kohima Smart City-i sensotem nem Emergency Health Service agütsütsü atema Smart Ambulance ana ya ali. Tanü state nung tensa asadangba sülen UDD & DMA Advisor Dr. Nicky Kire aser committee-i CoVID-19 wara mapang amshitsü atema Naga Hospital Authority ket nung agütsütsü telemtetba agi” ta CEO, KSCDL Kovi Meyase-ia ashi.
MD, NHAK, Dr. Thorse-ia Kohima Smart City dang pelaba metetdaktsü.
“Onoki iba ama ambulance kanga nüngdaka liasü aser tajungtiba nung amshitsü. Tang tashi nungbo Nagaland nung COVID-19 aketer ka danga puteta mali saka asenok zübazülema malitsüla” ta Dr. Thorse-isa ashi.
Tanü UBC Pastor, Rev. Dr. Rachulie Vihienuo-i Smart Ambulance anaji meshiteta sarasademtsü.
Smart ambulance nung Oxygen Cylinders b type/bulk type, Ventilator, ECG, Suction, Foot Suction, Monitor, Laryngoscope, 5 KVA online UPS, Portable Stretcher, Surgical Disposals, Syringe pump, Defibrillator aser AC Built in lir.