KSU-i UCIL & Centre dang uranium agitetba anentsü tuyur

Shillong, Rongjui (September) 3 (Agencies): Khasi Students’ Union (KSU)-i Uranium Corporation of India Limited (UCIL) aser Centre dang teti atema West aser South West Khasi Hills district tem den Meghalaya nung Hynñiewtrep nunger lushi nung uranium agiteba mapa anentsü atema tetuyuba agütsü.
UCIL-i Shillong aser Kylleng Pyndengsohïong-Mawthabah (KPM) uranium project anasa Wahkaji nung office tem shibangtsü telemtetba agiogo.
Centre-i Meghalaya nung uranium agitetba anentsü ta asüba tetuyuba ka agütsütsüla, ta Deobar nikongtsütsü KSU president Lambok Starwell Marngar-i ashi.
“Centre sorkari uranium agitettsü atema maongka angutsü ataa lira, parnokji shitakba tetsü (sorkar) masü saka stepmother ka ama asütsü. Nübo agi tangar memenepba lokti ajembangtsü merangba aser lisopurtem asoshi tebilemtsü mabenba sorkar ka asütsü” ta Marngar-i ashi.
“Ali telung nungi uranium agitetba mapa nung lendong keta lir aser tashidak aika adokdaktsüba atema linük aika nung uranium mines toktsüogo” ta paisa shisem.
India nung uranium ya Adivasi nunger alidak, nübo agi tangar memeneper lushi aser Jharkhand o Andhra Pradesh nung backward community pur lushi nungi dang agiteter. Uranium agitetba tesemtem nung nisungtem kangshir aser aika lemtar, ta paisa metetdaktsü.
“KSU-i 1993 nungi uranium agitetba anema noktaka arur. Ozü züngsem aika puogo, tepuokdak yuogo aser injang nungia jenbuogo” ta Marngar-isa ashi.
“Onoki taküm bendanga agütsütsü renema lir. India ya nuclear power linük ka kümdaktsütsü atema uranium agitetdaktsütsü ta nisung kari ashir, saka tangar ajangzükdaktsütsü atema Khasi nunger uranium ajanga lendong adoktsüba nung takoksartem masütsü” ta paisa shisem.