KSU lennir den asüpila sentong agiogo

Shillong, March 2 (Agencies): Meghalaya kübok Ichamati yimtsüng nung asüba KSU lennir Lurshai Hynniewta den asüpila sentong agiogo.
Hombarnü Sohra nung pa den asüpila sentongji ayonga agi.
Hokolbarnü CAA aser ILP atema senden ka amendang KSU züngsemtem aser tsümartem tsüngda obang meputep adoka raratepdang Hynniewta kanga mejungi yirua liasü.
Pa Sohra CHC-i anir ao saka idakji asü. Tanü pa den asüpila sentong nung nisung 2000 shi ka aden.
Sentong nung Meghalaya sports minister Banteidor Lyngdoh, Umsing MLA Jason Lawlong, aser Nongthymmai MDC Latiplang Kharkongor nungertem aden.
Külen, Hombarnü Meghalaya chief minister Conrad K Sangma-i Shillong Civil Hospital nung anepalurtem semdang.
Taoba anogo ishika tsüngda Ichamati aser Shillong nung mepetmesü adoka raradang yirurtem anepaluba nung sen endokba ajak state sorkari menoktsü, ta Conrad-i tanü metetdaktsü.
Tanü chief minister den home minister Lahkmen Rymbui, health minister A.L. Hek aser GAD minister Comingone Ymbon nungertemi Shillong Civil Hospital nung yirua alirtem semdanga liasü.
Yirua alirtem mozü kidang shitak anepaludar aser parnok teimba ka temang tajungba kümogo, ta Conrad-i osangbener dang ashi.
Parnok temang anepaluba nung endokba senotsü ajak state sorkari agütsütsü, ta paisa shisem.