KSU victory rally mangatettep adoker tembang

Shillong, Tsüklai/February 14 (Agencies): Bodhbarnü Khasi Students’ Union(KSU)-i ayongzüka Shillong nung victory rally akaba mapang nisung pongu tashi yirua liasü.
Rajya Sabha nung Citizenship Amendment Bill mebenokteti tembangba atema benjungteptsü asoshi victory rally akaba mapang parnok dak tangar dang nungi alia inyaksangshiba atema azük aser yirua liasü.
Superintendent of Police (City) SA Rynjah-i ashiba agi, osang kar ajanga rally nung shilem agirtemi Rynjah aser RR colony nung non-tribal tem indang dokan kar nung long agi aon aser raksatsü koba local temi mepelai liasü, ta TNT sangdong ka ajanga metetdaktsü.
Yirur alir parnok pongu ya mozüki bushia temang anepalutsü asoshi anirogo, ta Rynjah-i ashi.
Police temi iba ken o asadangdar aser tang tashi nungbo iba dak sendakba nung shinga pua mali. Iba tatalokba nung densema alir karbo onoki jangjaogo aser onoki jenjang tapet agitsü, ta SP-i ashi.
BJP puri Rajya Sabha nung iba bill mebenoktetba benjungtsü atema KSU züngsemtemi Shillong yimti nung gari aser bike rally ka ayongzük.
Rally nung shilem agirtem yagi BJP aser Ato Kilonser Narendra Modi anema yimyim ayim aser Ri-Bhoi district kübok Nongpoh nung aser West Khasi Hills district kübok Nongstoiñ tesem nung Modi aser Union Home Minister, Rajnath Singh na idang noksa rongtokja liasü.
Iba bill ajanga Bangladesh, Pakistan aser Afghanistan nungi tamangba yimsü tsütsü reshikangshirtem nem lisopur jenjang agütsütsü asoshi meranger.