KTACYA anogo ka asayamung kaogo

Dimapur, Rongjui/September 22 (Agencies): Kohima Town Angami Youth Association (KTACYA) puri ayonga anogo ka asayamung Küptoknü St.Mary’s Higher Secondary School ground nung kaogo, kong St.Francis de Sales (SFS) parish puri point 670 nguteta takok angu aser parnok sülen St.Mary’s Parish, Cathedral (point 300) tanabuba jenjang nung tembang. Asayatem rongnung penalty-shootout, basketball, volleyball, arm wrestling aser tug of war densema liasü.
Tongti tesemdanger ama iba asayamung nung adendang Vicar General Kohima Diocese, Rev. Fr. Neisalhou Carolus-i asayamung wako salaja asayamung tenzüktsü. Kasa mapang nung asayartem tenangzüktepba Vimetha Vincent-i achaayanga aka aser parish priest SFS Rev. Fr. Richard Fernandes-i Tsüngrem temoatsü meshia sarasadem.
Asayamung shibangba sentong nung tetsür aser tebur volleyball team sangdonga liasü, shirnoki taruba Angami Catholic Youth Association asayamung Yimpoksüi/Nov 2 aser 3 nü asayatsü aliba nung shilem agitsü. Iba asayamung ya Loyola Higher Secondary School, Jakhama nung asayatsü.
Maneni sentong nung Cathedral ACYA nungi teburtem aser Jennifer Mero-i ken aten aser Vikeyie Robert-i tepela o jembi. Kasa mapang nung KTACYA tir Kuotseituo John aser K.Andrew Tepa na lenisüba kübok tetenzük aser tatembang sentong aka.
SFS assistant parish priest, Rev.Fr.Peter Pithungo Enni-i takok angurtem nem sempet lemtsü aser temoatsü meshia sarasademer sentong tembang.
Iba asayamung nung St.Francis de Sales Parish, Angami Catholic Youth Association aser Cathedral Angami Catholic Youth Association nungi züngsemtemi shilem agiogo, ta ketdangser sangdong ka ajanga metetdaktsü.