Kü mechi nung Jayalalithaa-i 1996 election nung takok mangu: Rajinikanth

Chennai, December 11 (Agencies): “Asür J Jayalalithaa aser la indang politics anema ni yimjak nung jembiba ajanga 1996 Tamil Nadu election nung lai takok mangu,” da actor Rajinikanth-i Deobarnü ashi.
Asür J Jayalalithaa den asükhu lemsatepba sentong ka Nadigar Sangam (South Indian Artists’ Association)-i ayongba nung jembidang, “Kü indang o agi la kanga yirutsü. Kü mechi, lai 1996 election nung tamakok alu” ta Rajinikanth-i ashi.
Jayalalithaa ji election nung adokdaktsü nungbo Tsüngrem-ia Tamil Nadu mekümzüktettsü” ta Rajinikanth-i 1996 election mapang jembia liasü.
Tena tsüngda mangatettep liaka Rajinikanth-er jala kiyimba sentong nung Jayalalithaa-i arua atenba ajanga pa kanga pela aser süngmang. “Kü molungjang taret bener ni la ozü jala kibong akümba mapang arua adentsü asoshi asüngdang. Lar party züngsem ka kibong nunga kiyimba benjung liaka lai arua aden. Iba ama hon molungjang aketla tu joko asenokden mali” ta Rajinikanth-i ashi.
“Laji sentilong ka ama liasü. Teburi yimsü asüba lokti ka nung süaka lai sentilong ama sentsüprangshia liasü aser la tanü Puratchi Thalaivar MGR leper anasa Kohinoor sentilong ama anisüngzüka lir” ta Kabali film nung adoksang-isa ashi.