Kü taküm otsü film yanglutsü metemsü: Dharmendra

New Delhi, June 3 (Agencies): Hokolbarnü Actor tejen Dharmendra-i ashiba agi, pa taküm otsü nung ajemdaker film yanglutsübji pai anemer aser pa taküm otsü bushidanga film yanglutsü asoshi kodanga temelaba magütsütsü.
“Ni kodanga parnok nem kü taküm otsü meyangludaktsütsü,” ta pai osangbenertem dang ashi. Iba onük nung sendaka kechiba pa taküm otsü film meyangludaktsüner ta asüngdang dang pai ashiba agi, “Kü taküm otsü film yanglutsü asoshi malang. Ajisaka ni kü taküm otsü shilem shilem tanga lenmang len nungi ashitsü.”
Arishi küm 81 tain Dharmendra-i ashiba agi, pai pa taküm otsü kaket dena zülutsüba kecha tebilemba mali.
Actor tejen ya yakta film industry nung shilem agir küm 60 ajungtsü, pai iba mapang nung movie tajung aika nung shilem agia nüburtem jangratemdaktsüogo. Pai shilem agi film tem rongnung; “Bandini”,”Satyakam”, “Raja Jani”, “Pratigya”, “Sholay” aser “Chupke Chupke” nunger lir.
Tawa pai shilem agiba film tem rongnung “Apne” aser “Yamla Pagla Deewana” nunger lir. Tang actor ya pa indang mezüngbuba international film “Dream Catcher” nung shilem mazüngi agidar. Iba film ya Australia nung amener aliba producer Rishi Raj Films aser Kinopticon Productions den longjemer inyakba Indo-Australian project ka lir.
Iba film otsü ya temeimteper otsü ka lir aser iba tesendaktep nung techonology ajanga shilem agiba dak tali rangloker inyaker.
Maneni iba film nung Pooja Priyanka aser Australia nunger actor Travis Jeffery natia tongti shilem agir. Film otsü ya Rahul B. Seth zülu aser Santoshh Shivamm-i direct asür.
Dharmendra-i taoba mapang nung pa kinungtsü Hema Malini den “Seeta Aur Geeta”, “Sholay” aser “Dream Girl” nung külemi shilem agia liasü.
Tena kibong akümba sülen “Alibaba aur 40 Chor”, “Baghawat”, “Samraat”, aser “Razia Sultan” film nunger nung külemi shilem agi.
Pai ashiba agi, film nung shilem tajung kar ajanga dang tena külemi shilem agitettsü.