Kü temangi mela tashi asayatsü: Federer

Yimpoksüi/November 20, 2019 (Agencies): Roger Federer-i pa asaya nungi anentsü asoshi mezüngbuba 2009 küm bilemdanga liasü saka küm 10 lir arishi küm 38 tain asayar ya maneni kanga tashi ita asayadar aser pai ashiba agi, pa temangi mela tashi pa asayatsü.
Federer-i 2018 küm January ita tatemsa Australian Open koka Grand Slam kakoktetogo saka iba sülen pai ATP titles tenet kokogo. Pai tang tashi nung ATP titles 103 kokteta lir.
Federer, shiba Rafael Nadal aser Novak Djokovic sülen jenjang asembuba nung season tembangogo, pai ashiba agi, pa kodang asaya nungi anentsü aji meshitettsü.
“Ni asaya nungi anentsüba ya kü health dak keta lir. Tangbo ni kanga junga asayadar aser asaya nungi anentsü asoshi kuli kecha mangur,” ta Grand Slam 20 tashi koker alisang yagi South America nung exhibition match masaya tsüngda osangbenertem dang ashi.
“Ni küm 35, 36 ka tashi dang asayatettsü ta bilem saka ni tang idaki lir. Ni temang anema lir aser kanga junga asayadar. Ni asaya nungi kodang anentsü aji mejangja.
“2009 küm mezüngbuba ni asaya nungi anentsü bilemdang. Küm 10 sülen ni idaki lir. Ni tang ni mulungba jenjang ka nung lir,” ta pai ashi.
Open era nung Federer-i title trok agi America nunger asayar Jimmy Connors-i (109) yanglur aliba record metongi lir.
“Tambur küma aodang maparen ajak tasakba akümer. Ajisüaka kasa mapang nung tajangshiba ajanga item mapangtem tali jangratatemba agiteter.
“Koda tembangjar ni memetet. Asaya nungi kanga saka masü saka pelashishia anentsü imlaa atar,” ta paisa ashi.