Kü Timtem Bilemtettang – T.Ken 119:153-160

Nisung shingaia o bendangdaki mouner, kuli asütsü mouner. Tai aketerji koda balaka tamajungba! Saka na tetendangba nung noktakra, na asoshi bilemtsür ka lir meteta alitsü junger. Ken züluri Kibuba den jembibaji ibai lir, “Kü tepu kümang, aser ni alangzükang: ne tenangzükba ama ni rok a asoa kümdakjangma” (t.154).
Asenok asoshi pukümer tulutibaji Tsüngrem lir. “Tsüngrem asenok den lira, shibai asenok anema arutsü?” (Rom 8:31). Hopta tsüngda asenoki timtem ajanga aotsü akok. Tangari asenok anema tiyazü osang adoktsütsü akok, jangra matemtsü tia ajurutsü akok, kechiaser asenok anemer lir. Ken ken tangari asenok mangatetba ajanga asenok anema jembitsür. Item ajakji nai tanü ajanga aotsü akok saka ne tetendangba mapang ne den Tsüngrem lir. Kodang na aser ni atitangdir, Pai bilemdanger aser asenok pu akümer.
Pai mangatettepji bentettsür. Kodang asenoki Tsüngrem dang sarasademdir aser shidir, “Kü ken o bilemdangang,” Pai mapa inyaker. Pai asenok alangzüker aser kümzüker. Asenok aibelen mesüdaktsür aser tepuokdak meyutsür. Tsüngremi Pa nübur taküm timtem nungi kümzüker.
Asenok teimla samadang Tsüngremi yarir. Nai timtem ajurudang, na teimla makai akümtsü akok. Saka Tsüngremi na teyimla makaba jenjang nungi ajungketer aser Pai tashi agütsür.
Tanü kotak nung Yisui na asoshi mepishitsür. Pa ji ne kotaker Temepishitsür aser ne Temaba Putir lir. Na tatidang aser temenen nungi jenbutsü asoshi pai ne nem taochi agütsür. Saka nai temenen menara ne temepishitsür dangi nai aotsü akok. Pai ne dang tai atoktsü, merüktettsütsü aser ne ken-o nung ne pu akümtsü.
Kodang tangari na timtemdaktsüdir, Tsüngremi amshidakjang. Pai na kümzüktsü aser na teimla makaba nungi temaleni ajungkettsü. Yisui na atema mepishitsütsü aser tebui tai atoktsü.