Kubolong nungi tashi mangar ka küm 5 atema meintok

Mokokchung, Mongputeni/Oct. 30 (TYO): Kubolong nung alir nisung kati tashi mangai ozüng anema yi belenshiba dak sentakba maparen nung küm pungu atema meintokogo, ta osang ka ajanga angazüker.
Longpa nunger asür Chubatoshi’er jabaso Süpongmeren-i Kubolong Watsü Telen, Adhoc Town Committee aser alima ozüng anema Mongputeni/Oct. 27, 2018 anogo yi (rum) case 2 committee aser lanur longjemer apu, iba dak sentakba nung pa dak alang merenshia liasü, ta Watsü Telen Kubolong sangdong ka ajanga metetdaktsü.
Aji saka, maneni Mongputeni/Oct. 28, 2018 nü nikongdang iba nisung jagisa tashi mangai yi (rum) case 2 Kubolong-i bener aitba Watsü Telen Kubolong-i apu aser shiki nung yur Adhoc Town Committee nem agüja liasü, ta parnokisa kuli kar ashi. Pai nangzüka zülua aliba ama, lateta akaba senchi chir küm pungu (5 years) atema Kubolong nungi meintok, ta parnokisa shisem.