Kübu taküm otsü film yanglutsüji tasak asütsü: Saif Ali

September 06, 2015: Bollywood actor Saif Ali Khan-i, pai tebu Mansoor Ali Khan Pataudi taküm otsü nung ajemdaker saisapongba film ka yanglutsü jangrar, ajisüaka ibaji pa atema mapa kanga tasak asütsü, ta ashi.
Saif Ali Khan tebu ya cricket asayar ka liasü, aser tawa Bollywood nung tang saisapongertem taküm otsü nung ajemdaker film kanga bulua yangluteper aser iba dak sentakba nung tasüngdangba ka langzüdang pai, otsüji jangratemtsüka yanglutetra pai melunga lir, ta ashi.
“Ibaji otsü dak keta lir. Actor aikati ibaji meinyaktettsü ama ni bilemer. Film nung saisapongba shitakba ama asayatsüji tasak. Pa (tebu) ya stylish batsman ka liasü. Nai ibaji koma mesüka itettsü. Jabaso ka ama ibaji (film) junga meyanglutetra nüma metangtettsü,” ta pai ashi.
1952 küm nungi 1971 küm tashi Pataudi, Titular Nawab inyaksang, Mansoor Ali Khan Pataudi dang Tiger ta jaa liasü, aser taoba mapang nung Indian cricket team nung captain liasü. Lendong ka ajanga pa tenük ajichilen yiru saka maneni pai cricket asaya.
“Nisung karibo pa taküm otsü nung film yanglutsü akok saka Bollywood film bo meyanglutettsü, kechiyong pai ken matener. Nai oshi ana nung mesüra English oshi nung film yanglutsüb akoktsü südi,” ta Saif Ali Khan-isa ashi.