Kübu tepsetertem chioktsü-mechioktsüji sorkari lemtettsü: Rahul

New Delhi, March 03 (Agencies): Taoba mapang Ato kilonser, Rajiv Gandhi tepsetertem chioktsü atema Tamil Nadu Chief Minister, Jayalalithaa-i akhangba dak sentakba nung tanü India Today TV sentong nung jembidang Congress tatong Tir, Rahul Gandhi-i, “Ni officially ya ashir, iba onük ya Centre sorkar dangi aru aser iba ya sorkari lemtettsüla. Par jabaso ka ama ni kü nija tangatetba melemsatepner,” ta ashi.

Rajiv Gandhi tepsetertem chioktsü atema Congress nung lenirtemibo memelunger saka Rajiv’er jabaso aser Congress leniri Rahul-ibo, Narendra Modi’er sorkari iba telemtetbaji agitsüla, ta ashi.

Tamil Nadu sorkari Centre sorkar dang Rajiv Gandhi tepsetba ken o nung aija alir parnok nisung tenet chioktsü atema Centre sorkar dang mepishiba dak sentakba nung Congress-i Union Home Minister, Rajnath Singh dang telangzüba meshiogo.

Centre dangi züluba shidi nungji Tamil Nadu chief secretary, K Gnanadesikan-i, aitsür alirtem- V Sriharan shiba dang Murugan taka ajar, T Suthendraraja (Santhan), AG Perarivalan (Arivu), Jayakumar, Robert Payas, Ravichandran aser Nalini nunger iba ken o nung küm 24 tashi tepoukdak liogo, ta shia lir.

Parnok tenetprongla 1991 küm nungi tepoukdak alir. 1991 küm Tamil Nadu, Chennai yimti anasa election nüboyim sentong ka nung Liberation Tigers of Tamil Eelam (LTTE) nungi pei taküm bendanga agüja bomb pokdaktsür tetsür kati Rajiv Gandhi tetsüng nung apudaka lua ametdang bomb ji pokdakja liasü.

Iba ken o nung Murugan, Santhan aser Perarivalan nunger nembo tasüba temerenshi agütsütsü obendang agüja liasü, ajisüaka 2014 küm Supreme Court-i parnokji akumli piyong tepoukak ayutsü lemtet.