Kubza re-poll tiptema agiogo: 44.68%-i shilem agi

Kohima, Monupii (May) 30 (TYO): Nagaland nung yakünü polling station 2196 nung Lok Sabha menden atema by-election agi saka polling station ka nung timtem ajuruba ajanga tanü by-poll agitsüsa akümba tiptema agiogo.
Election Commission of India (ECI)-i Mokokchung district nung Aonglenden Assembly constituency kübok Polling Station No. 13-Kubza nung re-poll agitsü tetuyuba agütsü. Iba polling station nung vote agütsür ajak agi nisung 640 lir aser parnok rongnungi 44.68% ajanga tanü shilem agiogo, ta CEO Nagaland Abhijit Sinha-i ashi.
Monupii (May) 28, 2018 nü Lok Sabha menden atema by-election agiba nung vote agütsür 75% liasü.
Iba anogo Kubza PS No. 13 nung nisung telok kati EVM machine raksatsü aser iba jagi Deputy Commissioner-i ECI dangi re-poll asütsü osang aben. Iba tatalokba dak sendakba nung police-i nisung 7 pua lir.
Tentonü (Hombar) nikongtsütsü 1:10 ako meta nisung 60-70 shi ka polling station-i ao aser ballot unit o control unit raksatsü, ajisüaka parnoki VVPAT bo meraksatsü, ta Abhijit-isa metetdaktsü.
Asüngenp 8:00 ako nungi Nagaland kübok centre 13 nung votes azüngtsü.
Vote azüngba centres : DC office Dimapur, Old DC office Peren Town, DC office Kohima, DB’s Court Pughoboto, New DC Office Phek, Town Hall Mokokochung, Town Hall Zunheboto, Tiyi Hall Tsumang colony Wokha, DC Office complex Mon, DC Office Longleng, CKS Hall Tuensang, DC office Kiphire aser Nagaland Commissioner’s Office Kohima.