Kukami Memorial Trophy Tentonü tenzükogo

Dimapur, Yimpoksüi/November 26 (TYO): 39buba Aghunaqa Area Sports Association (AASA) Kukami (GBs) Memorial Trophy Tentonü Aghunaqa headquarter nung tenzükogo. Asayamung lapokba sentong nung NSCN, Vice President, Akato Chophy tongti tesemdanger liasü.
AASA wako atsükettsüba sülen sentepa aliba lokti den o jembidang, Akato-i asayartem dang, parnoki koda takok ngudir nguaka ajemalutsü aser yimya yimpong tajung benshitsü asoshi ajungshi.
“Asaya balala local jenjang nung dang asüyonga takok anguba sülenbo, asayar kati pa/la medeni par team tejakleni motettsü ta aiben bilemer aser asüküm ka aiter aser iba ajanga par telok tamakok dangi anir,” ta shia pai asayartem dang ajemalutsü asoshi ajungshi.
Akato-isa, asayartem aikati tarutsü nung parnok asaya nung kongshitsü ta tanaben mebilemdangi machi majemtsü achir, ta ashi. “Saisapong balala nung temaba jenjang tongtettsü asoshi sempet ya dang ajak masü saka asenoki aser temang kanga junga anepalua anema toktsütsüla,” ta paisa shisem.
Maneni tongti tesemdangeri, tanü asüng lanurtemi western culture tali ajizüka benshi tenzükogo aser tanem tanemi asen sobaliba ama odar, ta ashi. Pai, tetsü oshi kanga temulung agüja wazüka ayutsü asoshi ajungshi koba asen maitsü rongnung tongtibangtiba ka lir. Akato-isa, yimtsü yimbo akhümtsübuba yimya angazüka benshitsü asoshi lanurtem ajungshi.
Tesüiba anogotem nung pa aser tanga lenirtemi iba tesem terenlok asoshi koda inyaka liasü, iba indang bilemtetshia pai jembi.
Sentong nung Aghunaqa Area Kukami Kuqhakulu, tir, Mughavi Awomi-i lokti pelaa agizükba o jembi aser Pihekhu o Yetoho yimtsüng nungi nüburtemi sobaliba saya balala sayaa liasü.
Iba GBs Memorial Trophy nung yimtsüng 12 nungi asayartemi shilem agidar, koba Yimpoksüi/Nov 30 nü tembangtsü.