Kuki bandh ajanga Manipur Hills kongshiogo

Imphal, October 20 (Agencies): Taküm January ita nung Assam Rifles (AR) sepaitemi Kuki nunger ana tepsetba dak sentakba nung state sorkari magisterial enquiry osang magütsütba anema lungkak aita Kuki pressure group-i Kuki tesemtem nung ghonda 48 general strike ayongzüka liasü.

Taküm January 28 nü Imphal anasa Kadangbang tesem nung AR sepaitemi Khupneilal Neihsiel aser Robert Hesei Kipgen na tepset, iba tatalokbaji paramilitary sepai aser Kuki telungpur na kahtepba mapang atalok ta sepaitemibo ashir.

Tejashi nung Kuki nungeri tentetba Joint Action Committee (JAC)-i Deobar ayaterm nungi tenzüka ghonda 48 nokdang ayongzüka liasü, aser ibaji Kuki Inpi Manipur (KIM) aser Kuki Students’ Organization (KSO), general headquarters densema Kuki tentettemi pusemogo.

Tongtibang supply lenmang ana – Imphal-Dimapur aser Imphal-Silchar highway na jagi Hills nung Kuki aliba tesemtem ajanger asünungji, item lenmang nung nüngdakba osettsüset/aonsotsü abenba gari aser passenger bus tem mesenzüteti liasü. Ano Inter-state good gari aser passenger garia aika item lenmang nung anendena liasü.

Hill district ponguprongla- Senapati, Ukhrul, Tamenglong, Chandel aser Churachandpur nung Kuki aliba tesemtem nung shishilembaba tesemtem shibanga liasü. Iba den külemi sorkar office nung nisung aika maru. Ajisüaka iba nokdang ajanga Imphal West aser Imphal East nabo mekongshii liasü.