Kuki nunger lokti tentet balalai rally ayonga aka

Imphal, August 10 (Agencies): United People’s Front (UPF) aser Kuki National Organization (KNO) nati kin 23 tenüng nung nokdaker aser iba telok ana densema Kuki nunger lokti tentet balalai Bodhbarnü state ajunga nung Kuki nunger atema state balala ka khanga rally ka ayongzüka kaogo.
Kuki nunger tenüng nung UPF-KNO, Centre aser Manipur sorkar ta lokti asem ya yimden yimsüsüba dak sendakba jung tasemben buba senden kadar aser iba pusema Kuki Women Union lenisüba kübok Kangpokpi DHQs nung iba rally ya ayongzüka aka.
Osang ajanga ashiba agi iba senden nung tang tasen shimba interlocutor – Dineshswar Sharma, taoba director of Intelligence Bureau (IB) densema liasü.
Taoba küm October 19 nü tanabuba senden nung KNO aser UPF puri Kuki nunger lenir mezüngpur nüngdem nung state balaka khanga ken o ka benok.
Kuki nunger atem state ka khanga Manipur nung rally ya Kangpokpi district headquarters, Thomas Ground nung 7:30 ako nung aka aser iba sülen Trans Asian Highway No.1 len nungi Kangpokpi Bazar-i ao.
Parnoki banner and pamphlet tem bener iba rally nung shilem . Banner aser pamphlet nung, “Onoki Indo-Kuki yimden yimsüsüba tsütsü sensaksemba puasemer,” “State balaka kümtettsübaji Kuki nunger pungmang lir” aser “Kuki nunger atema kechiba state ka magütsütsü,” ta zülur liasü.
Rally medenzük tsüngda lokti senden ka Brigadier Thomas Ground nung aka, kong Kuki Inpi Kangpokpi tir Seikhomang Khongsai-i ashiba agi, iba sentong ya Centre nem Kuki nunger taginüba aser tejangraba metetdaktsütsüba atema lir aser UPF aser Kuki National Organization KNO dang onok parnok den dena lir ta sayutsüba atema lir.
Kuki Women’s Union lenir Hahat Touthang-i ashiba agi, “Iba senden ajanga Kuki nunger atema state tasen ka yakta kümtettsü ta imlaa sarasadema atar, koba onok timla aser tejangraba lir.” Pai Sorkar dang Kuki nunger temi Indian National Army nung bendanga agüja inyakba aser 1917 o 1919 tsüngda British nunger den Kuki War of Independence rara nung shilem agiba mamadoki bilemtetshitsü asoshi mepishi.