Kuki nunger teloktemi NSCN (IM) indang ken o tem tama bentettsü akhanger

Imphal, September 5 (Agencies) : India sorkar den yimjung olemtep joko tatembanglen kati arur ta tawa NSCN (IM)-i metetdaktsüba sülen, Kuki Inpi aser Kuki Movement for Human Rights Trust nati Prime Minister Narendra Modi dang NSCN-IM den tatembang telemtetba ka magidang Kuki nunger dak sendakba ken o tem mezüng bentettsü atema takhangba ka agütsüogo.
Mashisa tetsürtem, tila tanurtem, taintem aser matamabensartem dena Kuki nunger 905 tepsetba, Kuki nunger yimtsüng 360 samatsüba aser pei litsü nung Indian Kuki nunger 100,000 tashi pei talidak toktsür aotsüsa akümba onüktem atema tesüiba mapang India Prime Minister pungu nem memorandums 60 den tema agütsüogo saka tanü tashi item ken o tem mebentet lir, ta KI aser KMHRT nati Prime Minister Modi dangi züluba shidi nung shia lir.
Anungji, NSCN (IM) den tanangzüktep magidang Kuki nunger ken o tem tamasa bentettsüla, ta parnoki metetdaktsü.
Kuki nungertemi memorandum agütsüba Prime Minister temji, Narasimha Rao, HD Gowda, IK Gujral, Atal Behari Vajpayee aser Dr Manmohan Singh nungertem lir.
Parnoki tang teinyakdak Prime Minister nema memorandum anaben agütsüogo, ta ashi.
NSCN (IM)-i tanga lisopur telok balala noklang aika den alir, anungji tanüngba lisopurtem den haihaura makai telemtetba agira, iba jagi meputep ang tali adokdaktsütsü, ta Kuki Inpi aser Kuki Movement for Human Rights Trust nati metetdaktsü.