Kuki nunger ya Burma nungi arurtem anungji Naga nunger masü

Dimapur, July 1 (TYO): Naga linük nung Kuki nunger putiotsü kanga mejungi yanglushir jembir, anungji parnok indang shitakba otsü ashitsüsa akümer, ta Government of the People’s Republic of Nagalim, MIP-i sangdong ka nung metetdaktsü.
British Political Agent Col. Mc Culloch-i Burma nung Chin Hills nungi Kuki nunger ya Naga linüki anir aru. Naga chubatem yimsü süa aliba Naga yimtsüngtem amaktsü atema parnok anir aru. Hao, British nunger Naga litsü karbo atsünga agitet saka tanüngba ‘free Nagas’ ta asüba tesemtem tang tashi yamaji dang lir, ta MIP-i metetdaktsü.
British nungeri Kuki nunger nem muzzle loading guns agütsü aser parnoki ibaji amer Naga yimtsüng aika amak aser Naga nunger aika tepset. Ajisüaka, iba tatalokba süir British ketdangsertemi iba mapa inyakba atema sasa bilemba ashi aser Kuki nunger ket nungi prangpong-injangtem agien, ta MIP-isa ashi.
Yamaji atalokaka asen molungso aser akhümket obala nungertemi Kuki nungertem asen lima nung lidaktsü. Parnoki loyalty land tax agüja liyonga aru aser iba mapa posemtsü atema kulikaket aika lir. Kuki nunger ya tesem melenshia aliba kin ka lir aser ibaji Sir James Johnston-ia “Kukis are nomadic” ta shiogo, ta MIP-i ashi.
1957 küm India sorkari Burma nungi Manipur state nung Naga tesemtem nung alitsü aruba ‘Kuki refugees’ nem relief funds agütsü. 1963 aser 1988 nunga Burma nungi Kuki refugee meyirjang aika Naga litsü nung arua jenok. British nunger meyipa aoba sülen British nungeri atsünga agiba Naga nungertemi August 14, 1947 nü independence sangdong aser free Nagas den külemi longjem. Saka Kuki nungeri Naga linük nung kodaser ‘Kuki homeland’ ka kümtettsü meranger? Parnoki Chin Hills nungbo akümtsü temeten lir saka Naga tesemtem nungbo temeten mali.
Naga nunger ya tanga li nung masü saka pei litsü nung alir aser ali kiburtem lir. Naga nunger putiotsü ya litsü nung ajemdaka lir, maitsü-a litsü nung ajemdaka lir, sobaliba litsü nung ajemdaka lir, lokti litsü nung ajemdaka lir aser rongsenkettsüng litsü nung ajemdaka lir. Anungji Naga nungeri Tsüngrem nungi senmang anguba litsü kodanga tangar nem magütsütsü, ta MIP-i metetdaktsü.
Naga nungeri kodang Kuki nunger ya tsükchir ama mebilem, kechiyong obala nungertemi parnok den külemi liyonga aru anungji onoki kasa tangatetba nung alitsü renema lir. Onoki Kuki nungertem Naga linük nung shilem ka asütsü maongka agütsür, saka India sorkar aser Manipur sorkar den yaritepa Naga nunger litsü nung Kuki homeland ka tentettsübaji kodanga memolungtsü, ta MIP-isa ashi.
India sorkari Kuki nunger mesüra tangartem peladaktsütsü atema Naga nunger litsü nung kongshibaji aibelena inyakba mapa tulu ka asütsü. Anungji parnoki yamaji meinyaktsü amanger, ta parnokisa shisem.