Kuki nungeri Manipur Governor den ajurutep

Imphal, Mongputeni (October) 14 (Agencies): Deobarnü Anglo-Kuki War 1917- 1919 Centenary Commemoration Committee-i Manipur Governor Najma Heptulla den ajurutep.
Tanü Manipur Governor Heptulla-i la indang Twitter handle nung iba osang metetdaktsü.
Kuki nungertem ya alemli mapang nungi Northeast India nung liyonga arur aser parnoki India nung British nunger anema rara ta putiotsü ajanga ashir. 1917-1919 AD nung Myanmar tsütsü Great Anglo-Kuki War ji atalok.
Kuki nungertem atema World War-I kanga tongtipang liasü kechiyong parnoki British nunger Labour Corps nung adentsü memulung.
British ketdangsertemi Corps nung nisung tasen anioktsü tetuyuba agütsü aser Manipur chubai nisung 2,000 agütsütsü nangzük, saka Kuki anghtemi Corps nung adentsü memulung aser 1917 nung British nunger anema raratsü osang sangoktsü.
Kuki nungeri British nunger den küm ana tashi rara aser iba mapang nisung taküm aika lalu. Iba rara dang ‘Great Kuki Rebellion’, ‘Kuki Rising’, ‘Anglo-Kuki War’ aser ‘Zou Gaal’ ta ajar.
Yaküm October 17 nü Anglo-Kuki War (1917-1919) küm 100 ajungba bilemteta Chandel district kübok Lonpi yimtsüng nung sentong ka ayonga agi.