Kuki Nute Kiloikhom-i küm 12 ajungba anogo among

Peren/Kohima, Yimpoksüi/November 01 (TYO): November 1, 2019 nü Ahthibung Town, Peren District nung Kuki Nute Kiloikhom (Kuki Mothers’ Association), Nagaland-i küm 12 ajungbamong den külemi Chavang Kut benjung mongogo; iba sentong ya “Building together Mother’s essence” omen nung agi, ta ketdangsertem osang ka ajanga metetdaktsü.
Sentong nung tetushi tejaokerji Water Resources Advisor, Namri Nchang, akhümket tejaokerji Naga Mothers’ Association President, Abei Meru aser Chief host ji SDO(C) Ahthibung, Ruopfukuotuo Noudi, NCS liasü.
Tetushi tejaoker aruba mapang nung pai Pu Lengjang Kuki Memorial Park nung commemoration stone semzüktsü aser Pastor KBA, Nagaland, Rev. H. Minlen Singson-i meshiteta sarasademtsü.
Namri Nchang-i KNK (N) tenteter küm 12 ajungba atema parnok dang pelaba metetdaktsü aser lokti den Chavang Kut benjung salem lemsatep.
Sentong nung jembidang pai tetsürtem atema tongtibang shilem aser teinyaktsütem metetdaktsüba den külemi lokti nung tetsür ajak kasa züngshitsüla, ta ashi.
Namri Nchang-isa, oshi ya pei ayak/maitsü lir, anungji tetsü oshi samara ibaji pei maitsü sobaliba samar asütsü, ta ashi. Iba dak sendakba nung pai lokti dang pei oshi aser sobaliba wazüka ayutsü ayongzük.
Sentong nung Nagaland Women Commission nung taoba Chairperson, N. Sano Vamuzo-i souvenir sayaja liasü.
Anogo piyong sentong nung Medziphema Town, Chumoukedima Town aser Ahthibung Town nungi züngsemtemi ken aten aser Ahthibung, Bongkolong, Inbung aser Songlhuh Village nungi sobaliba yar tsüngsang ajanga shilem agia liasü.
Iba sentong ya Lhinghoichong Hangsing aser Hoisang Chongloi na leniba nung agi, Naga Mothers’ Association President, Abei Meru-i o tatsüka jembi aser Kuki Inpi President, L.L. Kuki-i tayongzükba o jembia liasü.