Kuki o Street Hawks na 22 buba Classic Cup quarter tongogo

Kohima, November 19 (TYO): Kuki United Football Club (FC) aser Street Hawks FC telok nati par asaya koka, tang Kohima nung tasayadak 22 buba Classic Cup football asayamong quarterfinal-i tanü, Honibar nü iogo.
Tanü mezüngbuba asaya nung Kuki teloki goal 2-1 agi Yhome FC telok madak takok angu.
Vilhoubeituo Yhome-i asaya tenzüker minute 7 buba nung goal agütsüba sülen par Yhome teloki asaya tenzüker minute 55 buba tashi temaba jenjang nung asaya.
Ajisüaka, asaya tembangtsü minute 5 shi anünga alidang, asaya tenzüker minute 56 buba nung Ginkholen-i goal meyiptsüba den külem asayar, Khaigin-i minute 59 buba nung takokba goal agüja, par Kuki telok nem takok ngudaktsü.
Street Hawks telokia goal 4-0 agi Renegades telok madak tanabuba asaya ajemshia akok.
Vikhosa Dul-i asaya tanabuba shilem tenzüker minute 4 buba nung goal 1 agüja, par Street Hawks telok temaba jenjang nung ajungkettsüba sülen külem asayar, Mhasikhoto aser Rüdzüviyie nati minute 53 aser 58 buba nung 2 buba aser 3 buba goal agüja, par telok maneni temaba jenjang ngudaktsü.
Tesülen, asaya injury added time nung Mhasikhoto-isa 4 buba aser takokba goal agüja, par Street Hawks telok quarterfinal-i anir ai.
Tan Deobar nü aser taruba Hombar nü na asaya masayai anisüngzükba sülen Barak FC aser Addax FC telok na tsüngda tan asayamong mezüngbuba quarterfinal asaya taruba Mongolbar nikongdang 2:00 ako nungi tenzüka asayatsü renema lir.