Kuki telok 22 buba Classic Cup final-i iogo

Kohima, November 28 (TYO): Kuki United Football Club (FC) teloki par semifinal asaya koka, tang tasayadak 22 buba Classic Cup football asayamong final asayatsü jenjang tanü, Hombar nü ajangzükogo.
Kuki teloki goal 3-1 agi Naga FC telok madak takok ngua, final asayatsü jenjangji ajangzük.
Tanü asaya tenzüker minute 36 buba nung Elminhao-i 1 buba goal agüja, par Kuki telok temaba jenjang nung ajungkettsü.
Asaya tanabuba shilem tenzüker mezüngbuba minute 2 nung, asaya tenzüker minute 47 buba nung Elminhao-isa goal takok ngua agüja, par Kuki telok goal 2-0 agi temaba jenjang kümdaktsü.
Tesülen, asaya tenzüker minute 82 buba nung Letminthang-ia goal 1 agüja, par Kuki telok goal 3-0 agi Naga telok den temaba jenjang nung ajungkettsü.
Senenlo-ia atazüktsüba asaya mapang, minute 90 abensatsü mapang nung goal 1 agütsü saka tanüngba asaya mapang aser injury added time nung par teloki tanüngba goal 2 memeyiptsüteti par Naga teloki tanü asaya nung tamakok angutsüsa jenjang tamajung ajurua liasü.
Kuki teloki defending champions, Barak Football Club den tan November ita 30 nikongtsütsü 1:00 ako nungi tenzüka, tan asayamong final asayatsü renema lir aser final asaya nung Nagaland Parliamentary Secretary, Youth Resources & Sports, State Lotteries & Music Task Force, Khriehu Liezietsu tongti tesemdanger alitsü.
Ano külen, Classic Club aser Kohima Press Club na tsüngda Classic Cup asayamong den sentaktepba Challenger’s Cup asaya tan November ita 29 nikongtsütsü 2:00 ako nungi tenzüka asayatsü renema lir.