Kulasekara international cricket asaya nungi anener

Chiteni/July 24, 2019 (Agencies): Sri Lanka nunger seamer Nuwan Kulasekara-i international cricket asaya nung anenba sangdongogo.
Arishi küm 37 tain asayar ya Sri Lanka nung fast bowler tem rongnung Chaminda Vaas aser Lasith Malinga na sülen ODI nung wicket timtiba agirtem rongnung tasembuba asayar ama asaya nungi anener. Pai asaya 184 nung wicket 199 agi.
Kulasekara-i küm 15 tsüngda T20 asaya 58 nung wicket 66 agiogo. Paisa Test asaya 21 nung wicket 48 agia lir.
Kulasekara, tatemsa Sri Lanka tenüng nungi 2017 küm July ita Zimbabwe den Hambantota nung asayaogo aser 2018 küm march ita nung tetoktepba balala kecha nunga shilem magi-i arudar.
2014 World T20 akokba Sri Lanka team nung Kulasekara-a densma liasü aser pai iba asayamung nung asaya trok nung wicket ti agi liasü.
Kulasekara ya 2009 küm March ita ICC rankings nung No.1 bowler liasü aser pai ODi nung tajungtiba asayabaji Australia den Brisbane nung asayaba mapang run 22 agütsür wicket 5 agi liasü.