Kulbhushan Jadhav kong ali’ar India-i memetet: MEA

Mumbai, April 13 (Agencies): India senso Kulbhushan Jadhav kong ali mesüra koma aliar Pakistan-i India nem kecha memetetdaktsür, ta tanü external affairs ministry (MEA)-i metetdaktsü.
MEA otongdar kati, Pakistan-i pa itangiter lir ta shia tasüba temerenshi agutsütsü obendang agüja alisang, Jadhav ya Indian Navy officer nungi anisüngzükba ketdangser ka lir, aser pai aibelena mali, ta ashi.
MEA otongdar, Gopal Baglay-i, “Onoki pa kong aliar memetet. Mesüra pa kechi tia ka nung aliar onoki memetet,” ta ashi.
Baglay-i ashiba agi, pa ya Iran nunger puer ao südi, kong pa shishilembaba mapa inyaker. Paisa, yaküm Iran sorkar nem osang agüja liasü, saka pa indang osang kecha mangu, ta ashi.
“Pa indang osang magütsüba mesüra pa anema ken o akaba yimya apir, pa tepsettsü sentong jelia yanglua liasü ta India nunger ajaki züngshir,” ta otongdarisa ashi.
“Iba nisungba ya kodaser Pakistan atong’ar onoki jangjatsüla; pa Pakistan nung alibaji onoki memeteti liasü. Iba atemaji onoki pa ajurutsü nüngdak. Pa ajurutsü temetenji International ozüng ka lir,” ta paisa ashi.
Jadhav-i itangittsü nükjidong nung Pakistan-i ao süra pa ket nung Indian passport malitsüla, ta paisa shisem.
India-i Pakistan dang Kulbhushan Jadhav ajurutsü atema taoba mapangtem nung 13 ben tashi asüngdanga liasü saka Pakistan-i memelung. Maneni Pakistan nung aliba Indian High Commission-ia Pakistan dang Jadhav ajurutsü atema mepishiogo.
Taoba mapang Indian Navy Officer, Kulbhushan Jadhav ya itangiter ka lir ta aija tawa Pakistan nung aliba court kati pa nem tasüba agi merenshitsü obendang agüja liasü.