Külemi lungjemer kiralongrar anema raratsü: Sisi & Putin

Cairo, November 18 (Agencies): Egypt Tir, Abdel Fattach Sisi aser Russia Tir, Vladimir Putin nati külemi lungjemer kiralongrartem anema raratsü tezüngzüktep ka tanü Bodbar nü agiogo.

Sisi o Putin nati tanü telephone ajanga jembiba sülen kiralongrar anema raratsü maparen nung alima ajunga ka küma lungjemtsü ajungshitsü lemtetba osanga jangjaogo.

“Syria-i ajurua aliba tensa tamajung tajungba kümdaktsütsü aser Russia’er A321 tayimtsü tsükokba den sentakba onüka tanü lenir anati benoka jembia liasü,” ta Egyptian Presidential Administration (EPA)-i osang jangjashitsü.

“Alima linüktem rong nung amalitep aser telongjem aliba ajanga dang Islamic State (IS) densema, kiralongartem madak takok ngua raratettsü ta lenir anati tanü pangjemogo,” ta osangi ashi.

Ano, Egypt kübok Sinai peninsula nung Russia’er tayimtsü tsükokdaktsürtem pua parnok nem ozüngi melaba ama tapet temerenshi agütsütsü asoshi Russia o Egypt nati külemi lungjemer nungdakba maparen inyaktsü asoshi Sisi o Putin nati tanü nangzüktepba osanga jangjaogo.

Syria ken o bentettsütsü maparen nung Egypt-i Russia nungita pusemtsü tenangzükba olen ka Sisi-ia tanü metetdaktsüogo.