Kulgam nung sepai 2 aser Hizbul kiralongrar 4 tepset

New Delhi, February 12 (Agencies): Deobarnü south Kashmir kübok Kulgam nung sepaitem aser kiralongrar tsüngda raradang sepai ana aser Hizbul Mujahideen kiralongrar pezü tepsetogo.
Kiralongrar aika lir ta police-i osang metetdaktsüba sülen army temi Srinagar nungi kilometer 60 pilar aliba Frisal yim mita ao. Tang tashi kahtepdar aser kiralongrartemji iba tesem nung aliba ki ka nung atsüka lir, ta osang angazüker.
Army, police aser paramilitary sepaitem senteper iba tesem nung ki ajak mita aodang Rashtriya Rifles sepai kati taila tsüngbang ka angu, aser iba nungji kiralongrartem atsüka liasü. Iba sülen parnok tsüngda rara tenzük. Iba rara nung Hizbul Mujahideen kiralongrar pezü kahset aser kiralongrar asem anasa aliba aremleni jena ao.
Kasa rara nung sepai pongu yiru aser parnok rongnung anabo süadok. Tanüngba sepai asemji tayimtsü ajanga Srinagar nung aliba Army indang 92 base hospital-i anir ogo.
Director General of Police S P Vaid-i, “Sepaitemi kiralongrar pezü tepsetbaji takok tulu ka lir, ajisüaka sepai ana taküm tenlaa asübaji tesasatsüka lir,” ta ashi.
Raraba tesem nungjagi prangpong pongu ngutetogo, ta police ketdangser kati ashi.