Kuli maliba deposits nungi saru 50% agitsü : Sorkar

New Delhi, November 28 (Agencies): Black money alirtem dang maongka sayua Hombarnü sorkari, kuli maliba sen deposits nungi shilem 50 saru agüjang, aser tax ketdangsertemi putetra deposits shilem 85 agütsütsüsa akümtsü, ta metetdaktsü.
Ato kilonser, Narendra Modi-i sen 500 aser 1000 notes anentsüba sülen hopta asem shi lir tanü Union Finance Minister, Arun Jaitley-i Income Tax ozüng yanglushitsü atema bill ka benokogo, kong black money sangdongertemi deposits shilem 25 sendem medeni anti-poverty scheme nung inoktsütsü aser küm pezü tepuokdak ayutsü.
Tang anenja aliba sen 500 aser 1,000 notes nung black money rizünga alirtemi sangdongra Pradhan Mantri Grabi Kalyan Yojana 2016 kübok parnoki mesangdongi aliba sen nungjagi saru shilem 30 agütsütsüsa akümtsü.
Iba dak alia mesangdongi aliba sen nungi senchi shilem 10 densemtsü aser PMGK Cess saru shilem 33 (shilem 30 nungjagi shilem 33) agütsütsü.
Iba den külemi black money sangdongertemi jungkai adoka ashiba nung bendenba nungi shilem 25, scheme ka atema agütsütsü; iba scheme ji sorkari Reserve Bank of India (RBI) den angatetepa sangdongtsü.
Iba scheme nungi senji tzü mesüba, ki yangluba, metsümeshidak, infrastructure, shisaliok aser anema alibaren ama project balala nung amshitsü, ta iba bill nung shia lir.
Ano, black money alirtemi mesangdongi lia putetra, tang aliba Income Tax ozüng yanglushia saru shilem 60 den saru nungi surcharge shilem 25 (shilem 15), agütsütsü aser ibaji senteper shilem 75 asütsü.
Iba dak alia ketdangseri dang lemtetra pai saru shilem 75 nungji senchi shilem 10 densemer agitsü.