Kulkarni dak Shiv Sena-i inyakba Shabana Azmi aser Mahesh Bhatt nati aitsüogo

October 12, 2015: Observer Research Foundation (ORF) mendenbuba, Sudheendra Kulkarni dak rong tanak rakloktsübaji India ama democracy linük ka atema maksütsü mapa lir, ta Shabana Azmi aser Mahesh Bhatt nungeri aitsüogo.
Pakistan foreign minister Khurshid Mahmud Kasuri-i züluba kaket India nung sayatsü aliba nokdangang ta ashiba Sudheendra Kulkarni-i mangaba ajanga Shiv Sena teloki Hombar nü pa dak rong tanak rakloktsü.
India ama democracy lima ka nung iba amai inyakba ya kanga tesüngmangtsü ka lir, ta film yanglur Bhatt-i ashi.
“Sudhendra Kulkarni dak inyakba ya ajanga asen linük temzüng, police aser democracy tetezü mali kümdaktsür,” ta Bhatt-i twitter ajanga ashi.
Shabana-i, “Shiv Sena lennir Uddhav Thackeray aser Aditya Thackeray na den jembitsü merangogo saka tenapronglai phone magizüker,” ta kanga temulung nemjema ashi.
Film actress tejen Shabana-i, “Shiv Sena-i Sudheendra Kulkarni dak mapa tamajung inyakba asoshi kanga mepelar. Ni @uddhavthackeray aser @AUThackeray na den jembinür saka tenati phone magizüker,” ta twitter ajanga lemsatep.
“Ajurutep dangbo @uddhavthackeray ya kanga tesüngjem nisung aser @AUThackeray bo par lanuwa medemertemi balaka, ta shiogo. Asenokbo külemi mener sensaksemdi,” ta laisa twitter ajanga ashi.
Kentener Sona Mohapatra-i, “Temeim Shiv Sena, Kulkarni dak rong rakloktsüba ajanga nenok linük meimer ka ta meshitet. Mapa tajung inyaknüra linük nung timtemer aser sensak tia ajungketba nung yaritsüar koda,” ta twitter ajangasa lemsatepogo.
Actor Rishi Kapoor-ia twitter ajanga, “Iba mapa ya kanga majung aser tai adoktsüla mapa masü. Osangbenertem senden nung yamaisa inyaker na?” ta lemsatepogo.