Küm 10 nung mapa million 115 nüngdaktsü: Tir Pranab

New Delhi, March 13 (Agencies): Rongsenkettsüng ainba nung ajak dendaktsütsüji yimsüsürtem atema tongtibang tayongzükba ka lir ta shia Tir, Pranab Mukherjee-i, India rongsenkettsüng ajanga taruba küm 10 tsüngda aluyimba mapa masüba mapa million 115 adokdaktsütsüla, ta ashi.
Pai ashiba agi, sorkari ‘Start Up India’ sentong tenzükba ajanga linük aser lokti ajangzüktsü atema linüki lanurtem sempet nungitba temaitsü sayur.
Honibarnü Raj Bhavan nung ‘Global Roundtable on Inclusive Innovations’ senden nung jembidang Pranab-i, “Tang lokti sentoker alir nisung million 350-400 atsür arutettsü atema linüki mapatong ka nüngdaka lir,” ta ashi.
“Mapa nung anioka küm 20-30 tsüngda ajangzüktsü atema tanü India ronsenkettsüng-i küm 10 tsüngda aluyimba mapa masüba mapa million 115 adokdaktsütsü nüngdaker,” ta ashi.
“Iba dak sentakba nung lanurtemi peisasa mapa angutsü atema ajungshiba aser ajungkettsübaji kanga tongtibang asütsü,” ta pai ashi.
Mukherjee-i, India nung yimsüsürtemi rongsenkettsüng ainba den külemi iba nungji nisung ajak dendaktsütsü atema tayongzükba ajurua lir.