Küm 125 sülen League nungi English club Bury aginogo

Luroi/August 28, 2019 (Agencies): Bury ya English football club rongnung tejentiba rongnung ka lir aser parnok Mongolbarnü Football League (EFL) nungi aginogo. Iba club senotsü tsütsü mepetmesü adoker aliba bentettsü mesera club alizüker tasen ka bushitsü atema tetuyuba agütsüba minyaktetba sülen league nungi agin, ta EFL sangdong ka ajanga metetdaktsü. C&N Sporting Risk puri League One (third-tier) club alitsü sentong liasü saka atakzüktsür aliba mapang atongtsü lia parnoki iba sentong thitsü.
Bury tentetba sülen küm teku lir 1894 küm Football League nung aden aser 1900 aser 1903 küm FA Cup dena kokogo. 1992 küm Maidstone pur league nungi aginba sülen parnok ya league nungi aginba mezüngbuba club lir. Osang balala ajang ashiba agi Bury alitsü asoshi offer asem tashi benokogo saka league-i parnok anintsü asoshi telemtetba agiogo kechiyong iba season par club fixture pongu tashi aginadokogo.
“Lenmang ajak asadangba sülen EFL Board-i Bury membership agintsü asoshi telemtetba agiogo,” ta kasa sangdong ajanga metetdaktsü.
“Fixture joko ojang dang melenshitsüla ta angatetba den iba tetoktepba inyakyim apir EFL Board-i iba telemtetba agiogo.”
Telemtetba tanga ka nung EFL-i, ano third-tier club Bolton Wanderers pur danga anogo 14 tsüngda parnok tebilemtsü bentettsü tetuyuba agütsüogo, ajita mesera parnoka kasa tia-i aitsü. Bolton pur tang senotsü tsütsü timtem adoka lir.
Bury kibur Steve Dale-i taoba hopta EFL dang pai C&N Sporting Risk-i offer agütsüba agizükogo ta shia liasü.
Iba firm ya Alastair Campbell’er jabaso Rory Campbell aser Henry Newman na meyong data & analytics company ka lir
EFL Executive Chair, Debbie Jevans-i ashiba agi, “tanü ya League otsü nung tamangtiba anogo ka lir. EFL-i iba amala tensa paitoktsü asoshi takok tashi inyakogo aser temulung mepelai iba telemtetba ya agitsüsa akümer.”
“Shingaia iba jenjang nung menokdakner saka atakzüktsür aliba anogo süiba aser League fixtures pongu tashi athiba den senotsü tsütsü tensa azüoka aliba kuli tejangja mongutetba sülen EFL board-i iba telemtetba ya agitsüsa aküm,” ta paisa ashi.