Küm 13 sülen India nung WWE ayonga asayar

New Delhi, January 15 (Agencies): Küm 13 tashi süidaktsüba sülen India nung World Wrestling Entertainment (WWE) tan mezüngsüa, tanü Hokolbar nü nungi tenzüka asayatsü tenzükogo.

United States nung amenokba toktepa melangtepba asayamong ya tanü aser asüng, Honibar nü New Delhi kübok Indira Gandhi Indoor Stadium nung asayatsü ayonga lir.

Taoba World Kabbadi League champion, Lovepreet Sangha aser taoba Kushti National Heavyweight champion, Satender Ved Pal nati tan mezüngsüa WWE asayamong nung shilem agi tenzükogo.

Great Khali ta ajasang, Dalip Rana sülenbo Sangha aser Pal na ya nungtugu WWE asayamong nung shilem agir mezüngbuba India nunger akümer lir.

Tan asayamong nung WWE world champion, Roman Reigns, Big Show, Kane aser Charlottec nunger densema tongti WWE melangtepertemi shilem agidagi.

Tar feet 6 talang aser temang touzük seret pound 225 taret Sangha ya 2014 World Kabaddi League nung tongti shilem agir ka lir.

Tar feet 6 ser inch 4 talang aser temang touzük seret pound 235 taret Pal-ia National Kushti Championships heavyweight shilem indang takok marok 2 ben tashi agizükogo.

You must be logged in to post a comment Login