Küm 15 sülen SBI Aghunato kongsang lapok

Dimapur, June 3 (TYO) : Küm 15 den tema süia arur Aghunato jila nung AGM SBI Mokokchung Gnanaseker G-i SBI Aghunato lapoktsüogo.

May 31, 2016 nü bank lapokba sentong nung Soil & Water Conservation Parliamentary Secretary, Pukhayi Sümi aden.

“Aghunato Town atema tanü anogo ya kanga dang tongtipang anogo ka lir aser asenoki mapang talangka nungi aginüa aliba aser longjema inyakba ajanga asangsang nung atalokogo” ta Pukhayi Sümi-i sentong nung jembidang ashi.

SBI Aghunato Branch mapang talangba shibangtsüsa akümba onüktem rongnung 1990s mapang Naga Yimten Telok kari bank maker sen auyaba aser sepai kar kahsetba onük dena liasü, ta Pukhayi-isa ashi.

2009 küm nungi pa den dena nisung aikati iba bank lapoktsü atema mapa inyaktsü tenzük aser jembiyonga aru. Public-i kanga nendaka aser meranga inyakba ajanga Aghunato jila renloker aser tejakleni aoer, ta paisa shisem.

“Mezüngbo Sümi nunger atema Aghunato Town ya tiyongtsü/tongtipang tesem ka liasü, saka sadoksari aser tanga technical onük kar atema Zunheboto-i belen” ta Pukhayi-isa ashi.

“Iba bank ya asenok atema lir, anungji asenok longjemer aser amalitepa iba bank pusema yariteptsüla. Bank dak sendakba maparen nung tetsükdaktsü bener arutsütsü atema inyakertem anema asenoki longjemer noktaktsüla” ta paisa ayongzük.

AGM SBI Mokokchung Gnanaseker G-ia o jembidang, bank kongsang lapokba nung yariteper ajak dang pelaba metetdaktsü.

“Tanü asen loktiliba nung chiyungtsü aser talidak ki nüngdakba sülenbo Bank ya kanga dang nüngdak ka kümogo. Anungji, public, Mulungtet teloktem aser costumers/clients-i iba bank mapa inyaksangshia aoba nung yariteptsü ayongzüker” ta paisa ashi.

Iba sentong nung AGM Mokokchung den staff, SBI Zunheboto Branch staff; ADC Aghunato; SH president; SKH/GBs; kaketshir tentet; village council lennirtem; DSCO Zunheboto; SDPO Zunheboto; parliamentary secretary aser pa meinertem, Aghunato Subdivision head of departments aser tangar aika aden.