Küm 2 sülen Assam nung cabinet züngsem 7 anioktsü

Guwahati, Rongchii (April) 25 (Agencies): Yangtepnü (Brihostibar) Assam nung Sarbananda Sonowal-i aniba ministry ulushitsü. Küm ana shi ka Bharatiya Janata Party aser regional party ana tsüngda menden lemsatepba nung mangatettep aliba ajanga cabinet züngsem maniokteti arur asüng anioktsü.
Assam assembly nung züngsem 126 lir aser iba nungi minister 19 alitsü akok, saka BJP-i aniba teloktep sorkar Monupii (May) 24, 2016 nü akümba sülen minister 11 dang shima lir.
Governor Jagdish Mukhi-i asüng minister tenet nem tenangzüktep agidaktsütsü. Parnokji BJP nungi 5 aser Asom Gana Parishad (AGP) o Bodoland People’s Front (BPF) nungi ka ka asütsü.
AGP aser BJP tsüngda cabinet ulushitsü atema obang meputepba ajanga iba mapa meinyakteti aru. Regional party anati menden anana lemzüka lir saka ano anana meshisem.
2016 Assembly election nung BJP-i menden 61 nungi, AGP-i 14 aser BPF-i 12 nung takok ngua liasü.
“Mapang talangka cabinet nung züngsem manioki aruogo. Tejak tasentem shimokba ajanga onoki sorkar ketdangsübaren tajungba akümtsü imlar” ta Chief Minister Sonowal-i ashi.