Küm 20 sülen Pakistan nung Hindu Cabinet Minister ka shimogo

Islamabad, August 5 (Agencies): Pakistan nung küm 20 sülen tang mezüngbuba atema Hindu minister ka shimogo.
Interim prime minister Shahid Khaqan Abbasi-i pai aniba cabinet tentetba nung Darshal Lal (65) shimok aser pai Pakistan kübok province 4 nung mapa inyaktsü.
Lal-i National Assembly nung tang kümsük tanabenbuba atema inyaker. 2013 küm pa PML-N (reservation for minorities) ticket nungi takok angu.
Nawaz Sharif anentsüba sülen kümtetba cabinet nung Lal dena lir aser iba ya 2018 küm tom nung general elections atema nübo ayimba inyakyim ka ama ajiteter.
Pakistan nung supreme court-i ozüng alema ken o ka benokaka, taoba finance minister Ishaq Dar nem kasa menden lemzüktsüogo.
Ano, Sharif den teyariteper tajung ka Khawaja Asif foreign minister kümdaktsüogo. Pa taoba mapang defence aser power ministry tem ketdangsüogo.
Taoba cabinet dang nungi tang kümtetba cabinet ji anasü agi tuluba lir. Iba ajanga taruba election dak rangloker mapa inyakba kuli sayur, ta Pakistani writer aser analyst Zahid Hussain-i ashi.
Abbasi-i prime minister kobika inyaktsü mesüra Sharif tenu Shehbaz nem menden agütsütsü indang telemtetba Pakistan Muslim League-Nawaz (PML-N) party-i ano magi lir.
Nawaz Shari-i pa keti rongsen aruba magizükba atema Supreme Court-i taoba hopta pa aitsü aser iba jagi pai prime minister menden azüngtettsütsüsa aküm. Ajisüaka, pai maneni PML-N ketdang asür aser Shehbaz-i parliamentary by-election ka nung takok mangu tashi Abbasi nem prime minister inyaktsü maparen inyak.