Küm 200 sülen Yisu leper lapoka yanglushir

Jerusalem, October 30 (Agencies): Jerusalem nung aliba Church of the Holy Sepulchre nung Yisu Khrista mang aremba leper, ta Khristan temi amangba tesem küm noklang ana shi sülen ‘preservation experts’ ta ajartemi lapokogo.
Otsüsütsü aketba mapa inyakbaji AFP photographer Gali Tibbon-i kuli süogo aser 33 AD meta ka nung Yisu tasümang zükdaka ayuba lung densema pai idakji noksatem tangokogo.
Iba tesem yanglushitsü aser archaeological analysis asütsü atema anogo asemnü leper shibanga ayuba marble tenembangtsü agiena liasü, ta osang ka ajanga metetdaktsü.
“1810 küm leper nembanga ayuba marble tenembangtsü agienba sülenbo tang mezüng atema agien. Tesüiba mapangji kitsükkirong lendong ka atalokba sülen agiena liasü,” ta Church of the Holy Sepulchre nung Armenian superior, Father Samuel Aghoyan-i ashi.
Marble agi yangluba tenembangtsü agienba sülen lenmang temesü ka nungji Yisu indang noksa ka lir. Marble agi nembanga aliba auyi aser osettem tendanga reprangdar, ta Aghoyan-isa osangbenertem dang ashi.
Yisu leper yanglushiba maparenji Greek specialists telok kati inyaker aser parnoki inyakba mapaji National Geographic-i osang bendena anidakdar.