Küm 21 sülen Bru refugee tem Mizoram-i meyipa aotsü

New Delhi, Chiteni/July 5 (Agencies): Küm 20 dak tema lir Bru nunger parnok 33,000 shi taruba ita Mizoram-i meyipa arutsü asoshi renemogo.
Sangtennü Centre sorkar, Mizoram aser Tripura sorkar aser Mizoram Bru Displaced People’s Forum (MBDPF) tsüngda Home Minister Rajnath Singh aser state ana nungi chief ministers matsüngdang tezüngzüktepba ka yangluogo.
Iba tezüngzüktepba nung Bru nunger kibong 5,407 nungi parnok 32,876 tang Tripura nung jenoka alirtem taküm Rongjui/Sept 30 matongdang Mizoram-i meyipa anir arutsü asoshi mulungtepogo.
Centre-i Bru nunger nem Mizoram nung arua parnok liyonga aotsü asoshi senotsü teyari balala agütsüba den security aser education dak sendakba nung tenüngdakba balala asadangtsü.
Maneni Special Secretary (Internal Security) lenisüba kübok committee kati iba tezüngzüktepba ya mapa küma inyakyonga aotsü.
Tang Bru nunger parnok 35,000 shi North Tripura district, Kanchanpur subdivision kübok camp trok nung jenoka lir.
2016 Luchii/Dec nung Home Ministry nungi ketdangsertemi parnok Mizoram-i anir aotsü asoshi tensa asadangtsü atema refugee camp tem semdangogo.