Küm 21 sülen CID shibangtsü: Sony TV

Mumbai, Mongputeni/Oct 23 (Agencies): Nüburtemi kanga sapua reprangba TV show CID ya Indian television nung crime-based series talangtiba sayuba ka asütsü aser iba show ya Mongputeni/Oct 28 nü nungi mapang tatsüka asoshi measyui atatsü, ta Sony Entertainment Channel-i Sangtennü metetdaktsü.
“Küm 20 sayuba sülen ‘C.I.D.’ ya Sony Entertainment Television cult show rongnung talangtiba sayuba show ka kümogo. Fireworks Productions den külemi jangratema inyaka aruogo aser tang CID ya Mongputeni/Oct 28 nü nungi tenzüka mesayui atatsü.
Iba show indang tatembangbuba episode Mongputeni/Oct 27 nü sayutsü.
Iba show ya yanglushir adoktsü akok ta shia show yanglurtemi ashiba agi, “iba show ya season tasen ka atema renemshitsü aser tanü asüng tensa den apet case tem benoka nüburtemi jangraba ama yanglutsü.”
Iba show ya mezüng 1997 küm tenzük aser iba ya Mumbai nung Crime Investigation Department (CID) nung detective team kati nisung tepsetba ken o balala putettsü merangba indang lir.
Show nung character pongu; ACP (Assistant Commissioner of Police) Pradyuman, Senior Inspector Abhijeet, Senior Inspector Daya, inspector Fredericks aser Dr. Salunkhe nunger ya kümtem tsüngda kanga nüngtugu kümogo.