Küm 22 sülen Imran Khan-i 22 buba prime minister inyaktsü

Islamabad, Luroi (August) 18 (Agencies): Honibarnü Imran Khan-i Pakistan nung 22 buba prime minister inyaktsü tezüngzüktep agiogo.
Islamabad nung aliba Aiwan-e-Sadr (the President House) nung tanü Pakistan Tir Mamnoon Hussain-i Imran nem tenangzükba agidaktsü aser iba sentong nung yimten aser mitkar lennirtem, taoba mapang saisapongertem aser linük balala nungi ketdangsertem aden.
Hokolbarnü parliament-i Imran Khan prime minister inyaktsü shim. Taküm election nung par party Pakistan Tehreek-e-Insaaf (PTI)-i takok tulu angu.
Chiteni (July) 25 election nü PTI-i menden teimba nung takok angu aser independent candidate tem den yaritepa teloktep sorkar ka aküm.
Yashi National assembly nung prime minister inyaktsü atema vote agitepba nung nung Imran-i vote 176 aser Pakistan Muslim League-Nawaz (PML-N) tir Shehbaz Sharif-i vote 96 nguteta liasü.
“Iba linük nung tanga teinyaktsü ajak dang tematibaji, tashishitsü melii inyaksangshitsüba lir” ta yashi parliament nung takok anguba sülen Imran-i ashi.
“Iba linük nungi auyartem aser sentsüh bentsür arurtem shinga mejenbudaktsütsü ta ni tanü nangzüker” ta paisa shisem.
Arishi küm 65 tain Imran Khan-i küm 22 tashi yimten mapa nung inyaka aruba sülen Pakistan nung prime minister 22 buba inyaktsü.
1992 pa captain sür Pakistan national cricket team-i World Cup takok angu aser tanü sentong nung pai taoba mapang pa den külemi asayartem kar jaok.
Sentong nung Army Chief Gen Qamar Javed Bajwa, taoba Indian cricketer Navjot Singh Sidhu, cricketer-nungi commentator akümer Rameez Raja, taoba mapang bowler Wasim Akram nungertem aden.