Küm 33 sülen African Union-i Morocco tanaben züngokogo

Addis Ababa, January 31 (Agencies) : African Union (AU) nungi Morocco linük küm 33 pilar aliba yashi, Hombarnü nungi tanaben züngokogo. Parnok tanaben anioktsü asoshi linük karibo kanga nokdangtsü meranga liasü.
Shisatsü ajak kanga anibelema olangtepba sülen disputed tesem ‘Western Sahara’ ken o tanga mapang ka nung jembitsü lemtet aser Morocco linük African Union nung tanaben züngoktsü ta mulunger timba süa parnok kibong nung tanaben züngsem ka kümdaktsüogo.
“Morocco-i kecha taginüba mesüra takhangba melii parnoka Union nung tanaben züngsemtsü ashiba ajanga onoki parnoki mepishiba ama African Union nung agizüktsü lemtetogo,” ta Sahrawi Arab Democratic Republic (SADR) nung foreign minister, Mohamed Salem Ould Salek-i ashi.
Western Sahara tesem ya dang SADR kübok lir.
Morocco-i tesüiba mapang Organisation of African Unity (OAU), (tang African Union) nungi Western Sahara tesem ya mesalatsüba ajanga 1984 küm pila.
Karibo Morocco-i parnok AU nung adentsü atema SADR anendakjang ta ashitsü amai bilema liasü.
Morocco-i tesüiba mapang Spain nunger aliba tesem parnok chuba yimli kübok lir ta ashir ajisüaka Polisario Front-i iba ji anema nokdaker.
Salek-i, Morocco AU nung tanaben adenba ajanga SADR tali ajungmesoa International Court of Justice-i 1975 küm lemtetba ama takhangba ka benoka parnok teinyaktsütem tembanga inyaktettsü, ta ashi.
“Tang nungi Morocco linük AU nung züngsem tejangja kümogo. Mapang talangka parnok atema kanga atsütepa aruogo aser Western Sahara ken o metembangi liaka linük 54 rongnungi linük 39-i mulunga parnok meyipa agizükogo,” ta Senegal Tir Macky Sall-i osangbenertem dang ashi.
“Onoki ashiba ama, kodang kibongji tuluba kümdir asenok kibong ka ama lenmangtem pateta otettsü,” ta pai shisem.