Küm 5 nung Nagaland nungi complaints 96 dang liasü: NHRC

Kohima, March 15 (TYO): Tesüiba küm pongu nung National Human Rights Commission (NHRC)-i ken o lakh 1.4 dak tema agizüka liasü, item rongnungi Nagaland nungibo 96 dang liasü, ta tanü NHRC-i metetdaktsü.
Tanü Kohima nung ‘Gender, Social Justice & Human Rights with reference to North East’ National Seminar nung jembidang NHRC Joint Secretary, Ranjit Singh-i, meimchir temeten anema inyakba ken o agütsüba 1,40,325 nungi timtibaji Uttar Pradesh, Odisha aser Haryana state tem nungi liasü, ajisüaka ken o ishitiba agütsüba state tem rongnung Nagaland densema lir, ta metetdaktsü.
Ajisüaka tesasaba olen ka nung pai, Nagaland nungbo tang tashi State Human Rights Commission tenteta mali, ta ashi.
NHRC ya meimchir temeten wazüka ayutsü aser Human Rights Act wazüka ayutsü atema tentetba telok ka lir ta shia pai, Commission-i benokba onüktem rongnung shilem 98 bo agizükogo aser itemji state sorkari inyakdar, ta ashi.
Iba sentong nung jembidang Nagaland University Vice Chancellor (in-charge), Prof. N S Jamir-ia, “Senso tajung ka ama, asenoki asen temeten atema raraba dang masü saka linük senso tajung ka ama asen teinyaktsü mapatema inyaktsüji tongtibang,” ta ashi.
‘Temeten aser teinyaktsüji liromedema asütsüla’ ta shia pai, loktiliba nung ochi obendangji, arok temeten aser maongka kasa kümzüka ayuba dak alia lokti nung maongka junga mangurtem atema inyakba lir, ta ashi.
Iba seminar ya National Human Rights Commission aser Nagaland University nati senteper ayongzüka liasü.